"Se alkaa olhen jo kevhän tuntua ilmassa. Pakkaset on kavonhe, mitä nyt yölä ollu jonku verran. Valoaki piisaa. Pihala näkkee kävelä vielä puolilta öinki. Sieltä se kesä pikku hiljaa tullee vasthan.
Lämpimät kelit on tuonhe lintujaki takas pohjoshen. Risukoissa tirskuttaa ja viheltellee jos minkälaista piipittäjjää. Soma kuuunela niitä pitkän hiljasen talven jälkhen. Ei ole kylläkhän oikhen keriny bongailemhan mithän, mutta kyllä se häätyis ottaa itteä niskasta kiini ja lähteä sulapilkkoja kattelemhan.
Pitäs alkaa tekhen niinku nuorempana, ko sitä piti kirjaa kevhän merkeistä ja lintujen tuloista. Kaikki merkithin tarkasti vihkhon ylös. Isäki piti sääpäiväkirjaa, mutta ei se paljoa muuta kirjotellu ylös.
Työt on pitäny sen kiirheisenä, että pilkilä käynikki on vähissä. Olen mie kuitenki päässy sauvvukalan makhun. Ei senthän niin kehnosti ole menny.
Mie kaivoin pyöränki esile. Häytyy kuiteski vielä jonku aikaa liikkua jalkasten, ko siittä vietävästä oli taasen rengas puhki. Son melkhein jo semmonen meijjän yhteinen kevätratitio, ko se pittää vaihtaa joka ikinen vuosi. Heikoksi on kumit nykyhjän tehty. Pittää viikonloppuna vaihtaa, jos mulla vain on sisäkumeja varastossa.
Pikkusena tuli poljettua pyörälä koko paljon. Ja keräthin kilpaa pulloja toisten poikasten kans. Pussitolkula sitte viethin niitä kauphan ja ostethin tietenki jotaki hyvvää tilale. Isän autola niitä kuskathin. Siinoli Datsunin peräkoppi monesti täynä.
Nyt häätyy ottaa polsteri kahverista, ahvalasit pöyvvältä ja lähteä kartanole touhuamhan. Ja vielä pittää muistaa laittaa rasvaa naamhan, ettei juuri nokka heti pala.
Ja eiku ahvottumhan, tet kans!
Ei kommentteja:
Lähetä kommentti