Kala ei ole oikhen ollu syönilä. Tavalisesti jo pääsiäisen aikhoin on jo saanu savustaa monta pöntölistä. Nyt tuli juuri sen verran, että sai yhen pöntölisen täythen. Suurin osa ahvesista on semmosta tirrin mittasta. Särkeä on kuiteski tullu paljo. Se vain ko mie en ole oppinut tekhen niistä oikhen mithän muuta ko kissanruokaa. Naapurin katti on suorasthan pörrönä niihin.
Iskukoukusta senthän tuli semmonen vajjaa parikilonen hauki. Tettä uskokhan kuinka soli hyvvää, ko sen käytti pannula. Pitkästä aikaa veres kala maistuu hyväle. Niitä ei kuitenkhan jaksa monta syyä, ennenku kyllästyy.
Kävimä met kokkeilemassa monta harripaikkaaki, emmäkä saanhe ko yhen pikku tammukanpoikasen. Ei napanu vaikka kokkeilima semmosiaki paikkoja, jossa ei kukhan ollu vielä ees käyny.
Luultavastikki kala alkaa syömhän vasta viimi keleilä. Häytyy käyä kokkeilemassa. Parhaten niitä tulis ko rannat on porheila, mutta kulku mennee jo hankalasti. Sillon on jänkät vetenä ja osan matkaa pittää ajjaa jo maata myöten.
Pilkkiviikkoki on alkanu. Pittää käyvvä kattomassa, onko paljo osalistujia. Joku sano, että niissä olis ollu semmonen 50-60 osallistujjaa. Son alle puolet eellisvuojesta. Ei oikhen hyvältä vaikuta, ko niitä on tavalisesti semmoset puolitoistasattaa. Kyllä meijjän pitäs alkaa jotaki tekhen asijale. On se kyllä tuo bensaki niin riethan kallista, että ei haluta kauhesti lähteäkhän koluamhan.
Käykää hyvät ihmiset kokkeilemassa kisoissa. Aivan samala laila sieltä saapii paikalisekki ko turistit. Eikä monessa kisassa tartte saaja ko yhen kaks hyvän kokosta haukea, niin pääsee palkinoile. Ja jos ei muuta niin ainaki käyvvä makkarat syömässä ja kahvit juopasemassa. Kannattaa ainaki sillälaila pikkusia seuroja. Ei net muuten jaksa tyhjänpäitten piettää kisoja."
Ei kommentteja:
Lähetä kommentti