"Vaikka meilon ollu riethan kylmä kevät, niin viihmeinki alko lämpenemhän. Pilkiläkhän ei ole hyöväny käyvvä, ko kalakhan ei ole syöny. Linnukki on vasta joku päivä sitte ilmestynhe kunnola maisemhin. Tässä yks ilta mie kattoin ko jääty järvestä sulapilkakki. Ei sole muuttolinnuila oikhen rapeaa ollu. Ruoka on lujassa.
Mutta eikhän se nyt ala jo kunnola lämpenemhän. Pihaki on jo niin sula, että pääsee kohta harkkaamhanki. Tässon talvikampheita kannettu varasthon ja kesävehkhet kaivettu esile. Grilliä en senthän vielä tuonu, mutta kohta seki varhman otethan käythön.
Pitäs alkaa tuo venekki tervaamhan, mutta häätyy vielä oottaa lämpimämpiä päiviä. Sei oikhen toimi kylmälä kelilä. Mutta sitte saapiiki katiskan vethen ja pääsee herkuttelhen. Onko parempaa olemassakhan ko veres kala?
Mutta nyt mie lähen ranthan kävelemhän ja kattelemhan lintuja. Valoa on jo sen verran paljo, ettei sieltä malttais milhän sisäle lähteä. Mutta häytyy se kuiteski. Muuten ei jaksa aamula töihin herätä.
Mulla on ollu näkemättä yks lempilintu, jota molen yrittäny tihrustaa. Viihmein mie eilen illala näin sen. Suopöllö on ylhensäkki aikasten liikhelä, mutta tänä kevhänä se ilmesty aika myöhhän.
Ei muuta ko kumpparit jalkhan, pipo päähän ja kiikari kaulhan ja eiku bongailemhan.
Ei kommentteja:
Lähetä kommentti