"Soma taas kattoa tuota jokavuotista luononnäytelmää, ko kevhälä lumet viimein sullaa ja alkaa jäät lähtemhän. Jänkät on täynä vettä, ojat ja joet tulvii. Luonto herrää uuesthan henkhin ko aurinko alkaa taas kunnola paistamhan. Lämmin eikä tartte vielä sääskienkhän kans taajoa."
"Ensin tuntu, ettei tänä vuona ei olekhan kunnon tulvaa. Vesi oli ensin paljo matalammala ko aikasemin, mutta äkkiä se sitte nousahtiki. Vaikka meilä ei sillä laila ole hättää, ko asuma niin ylhäälä, mutta nuot naapurit tuola alempana on jo helisemässä. Toivoma loppukevhääksi vielä kylmää, että net ei senthän heti huku. On se tääläki jokku talot lähelä kastumista, mitä tuossa nyt on ajellu kattelemassa."
"Kumma ko antavat rakentaa semmoshin paikhoin, että joka vuosi piha peshän. Son kyllä toishaalta helppo. Se vain, ko pittää kamphet sitoa ettei tulva vie menneshän ja rakenukset eristää lastiikilla ja hiekala. Tolppien nokhan net pitäs tehä, taikka aina parempi, ko rakennettais tievan nokhan. Ei tarttis taajoa joka vuosi uuesthan ja uuesthan."
"Vaikka siittä tulvasta on paljo haittaa, niin on se kuitenki komeaa katteltavvaa. Tämän perän ihminen on osanut hyövyntää sitäki iät ajat. Ei ole jääny sormi suuhun. Päin vastoin. Kalastaminen alkaa heti ko sulat ilmestyy ja muuki kurpominen samaten. Se kuuluu normaalhin vuojenkulkhun"
"Lähe siis sieki kattelemhan ja nauttimhan kaunhiista kevättulvasta. Jos et muuten siittä välitä, niin nyt on muutenki hyvä aika vaikka tervata reet ja venhet. Kohtahan met pääsemäki sitte verkonheithon."
Ei kommentteja:
Lähetä kommentti