"Ompa ollu oikhen somat kelit. Lämmintä on piisanu pitkhän ja sitte alko ukkostamhan. Tuntu ettei se muuta osanu tehhäkän ko piettää mustia pilviä ja möyrytä oikhen möyryämisen ilosta. Enämpi tuli puhelimesta seurattua ukkostutkaa ko somea.
Tässä sitä on yrittäny tehä kaikki hommat alta poijjes ennen sääskeä. Ei ole oikhen keriny keskittyä kirjottamhankhan. Mutta nyt on melkhein kaikki tärkeimät saanu tehtyä. Vielä pitäs vähä nuita koijjuja tehä, niin alkas olla voiton puolela.
Tulvaki on laskenu niin vois lähteä kokkeilhen, oliskhan kala syönilä. Verkola ja katiskala sai sen verran verestä kallaa, että pahimoilhen pääsi makhun. Se pisti haluttamhan lissää. Kyllä se veres tauro ja paistettu kylmän veen hauki on hyvvää.
Joku sääski jo lentää. Niistä ei kuitenkhan ole ollu haittaa, mutta ko mäkäräkki on jo tulhe. Net riethat tullee nykysten sääsken kansa yhtä aikaa. Nämät ensimäiset onki isoja ko mahottomat ja niin nälkhäsiä, että net ei meinaa päästää irtikhän, ko net huitasee pois iholta. Tuntuu, että iho sinkuu ko niitä vettää pois. Niin lujhan net purree. Ja pistokohasta aivan veri vuotaa. Iso punanen pilkka jääpii ja seuraavana päivänä kutisevat ko vietävä.
Nyt onki taas kova miettiminen, mihin net ohvit viime kesänä taas pukkas. Onneksi niitä purkkeja löytyy joka komerosta, ko tullee aina ostettua uusia, ko edeliset on jossaki jemmassa.
Onkivehkhet mie jo löysinki. Nyt pitäs vain saaja aikaseksi lähettyä. Son kuiteski tämä meijjän kesä niin lyhkänen, ettei sitä oikhen passaa tuhlata tyhjjän aikomishen. Son muuten kohta kesäkuuki menny, eikä ole keriny nauttimhankhan."
Ei kommentteja:
Lähetä kommentti