"En usko, että molen ainua jolla on levoton olo kevhäisin. Sei ole kuitenkhan semmosta huonoa hommaa ollenkhan. Ko tuo lissääntyny valo kuttuu koko ajan ulos seuraamhan kevhän tuloa. Pystyis ees pihhaa harkkaamhan niin olis joku syy olla ulkona. Ei juuri viittis porthaila istua. Lunta on kuitenki sen verran, ettei pysty vielä mettässä kulkea jalkasin.
Nyt se sitte on kevät kuiteski viralisesti alkanu. Nyt vapun aikhoin näky ensimäiset sotkat, joukhaiset ja yks hanhiki. Soma. Maalintuja ei kyllä ole näkyny ejellenkhän.
Kelkalaki sai huijjella menhen missä vain. Joet ja järvekki olit kuivat. Tuuli vain oli niin kaalo, ettei kovin ohkasila vaatheila tarjenu pilkkiä. Vishin kalakki piti kylmää, ko niitä ei tullu ko muutama pikku ahven. Jäi savustus kyllä välhin.
Parisen viikkoa tässä olis vielä aikaa tihrustaa aventoa, sitte alkaa olla aika heikot jäät ja kelkala kulku loppu. Ellei sitte lähe käsivarressa käymhän. Mie kattelinki tuossa yhtä koskea, son kohta niin sula, että käyvvä heittelemässä virveliä siinä. Perho kylläki saattas olla parempi, ko kalat ei varhman kerkiä ottamhan vielä vilkhun kiini.
Pittääpä alkaakki laittamhan vene kunthon. Vielä ko pikkusen jää sullaa, pääsee heithän verkon rantaporheshen. Saapii tehä haukipihviä, ko saapii verestä kallaa."
Ei kommentteja:
Lähetä kommentti