Voi mahoton ko tuulee.

 

     "Soma kattella ikkunasta, ko orava yrittää päässä linnunruokhin käsiksi. Molen laittanu talipallot pitkän narun päähän, ettei net pääsit niitä syömhän. Kovasti se kurkottellee, mutta tuuli viskelee palloa koko aijjan. Kumma vain, ko ei yritä hyppäämällä. Ei se nyt niin korkealta maahan mätkähtäis. Pään korkeuvvella net vain on. Molen nähny ko non hypänhe paljo korkeamaltaki.

   Tähän aikhan pitäs alkaa olhen kovia tuiskuja, mutta aika vaisuja non olhet. Viimi vuosina ei ole ollu oikhen kunnollisia myräköitä oikeasthan ollenkhan. Ennen vanhhan sitä oltin kotona motissa monta päivääki välhin, ko lunta tuli vaakatasossa puhalsi tiekki tukhon. Pellollekki ko katto, niin ouvvompi ei olis tieny tien olosta mithän, ellei sielä olis tikkarisuja näkyny. Sammaa tasasta siljoa oli koko aukea. Tuiskuko loppu, niin lähethin sitte kaivamhan tallin, liiterin ja varaston ovet auki ja aukasthin traktorilla pihat ja tiet.

     Mie muistan elävästi yhen kerran, ko isän Carinala olthin käymässä Hetassa ja lähelä kotikyllää oli postiauto jääny tien pääle kiini. Tie oli tukossa ja kuski oli yrittäny kääntää auton takasi ja soli perruuttanu yhessä tiehaarassa ja eihän se päässy umpisessa mihinkhän. Siinä se oranssi bussi sitte oli poikittain tien päälä ja sulki koko tien. Sen aikasissa autoissa ei ollu kovin kummosia lämmityslaitheita ja kyllä siinä alko pikku hiljaa kaaloki tulhen. Isä kahloki soittamassa siittä lähitalosta sitte kyytiä, että pääsemä kotia. Kohta pari kyläläistä tuliki kelkala paikale ja siinä sitte istuima reessä viltin alla kyytitettävinä. Auton piti jättää sinne tiele ja seuraavana päivänä isä haki sen poijjes.

     Siihen aikhan aura-autot liikku tuiskula eestakasin ja pietti tietä auki. Nykyjhän sielä istuu jossaki Kittilän perukoila päivystäjä konhen ääressä ja laittaa autot sitte liikhele, ko on tarpheeksi ihmiset valittanhet teitten kunnosta. Monestikki on tien päälä lunta lunta kymmenen viistoista senttiä ja vuomain kohila puoli tietä ummessa, eikä auraa nävy mishän. Auton lisävarustheishin kuuluuki nykysten iso lumilapio ja hiekkasäkki. Kelkkapuvusta puhumattakhan. Ja kauvemas lähtiessä pittää olla tankki täynä ja evhäkki mukana. Yläperälä saattaa mennä monta tuntiaki, ennenku pääsee liikhele.

     Nykysten kaikki yksityistethän ja raha ratkasee joka asijassa. Ennen vanhhan oli ainaki kaks laitosta, joihin pysty luothan: TVH ja TVL. Jotenki niitä on jääny kaipaamhan..."