"Laskiaista ei ennää meinaa muistaa juhlistaa. Ennemin, ko lapset oli pieniä, tuli niitten kans käytyä mäenlaskussa. Ei tarvinu olla kovinkhan kummosta törmänlaitaa, ko pulkka viuhu menhen. Siinä meinas tulla melkhein hiki, ko piti aina kiikkua takasi törmän pääle ja vettää pulkka perässä. Välhin sielä oli läpikki kyytissä. Sitte ko net vähä kasvo, niin net onneksi kiikku itte ylöski. Mie itte laskin jonku kerran ja lopun aikaa kattelin ko ohitte suhahti pulkan täyvvellinen kakaroita suut messingillä.
Pienenä koulhun piti ottaa joku laskuväline mukhan ja käythin aina laskemassa kouluntörmässä. Useaman tunnin siinä temuthin ja sen päätheksi saathin aina kuumaa kaakaota ja laskiaispullaa. Ja kyllä keittiöntäti osas tehhäkki niistä hyvän makusia. Sen jälkhen ei ole ennää misthän saanukhan niin hyviä. Vai onkhan se niin, että aika kultaa muistot? Toishaalta mie muistan kyllä tillilihanki ja janssoninkiusauksen, joita ei saanu menhen alas milhän. Nyt sitä pitäs ennemin nälkäpäivää ennenku suostuis niitä syömhän. Onneks nykyjhän ei tartte ennää pakolla syyä, jos ei kertakaikkijhan saata.
Met mietimä tuossa, että aukeaakhan Hiihtomaa tänä vuona ollenkhan. Sielä olis soma käyvvä vaikka ittekki laskemassa pulkala. Siittä ensimäiseltä tasantheelta tosin, ettei ihan hullun lujjaa tule alas. Siinä saattais muuten käyvvä niin, että luononsuojelijat saattas suuttua, ko raavas mies tulis ainaki kolmeasattaa alas huipulta ja pistäs törmän alla mettää sileäksi. Siinä olis taas yks avohakkuu-aukea lissää...
Oikhen mukavaa laskiaista kaikile. Ottakaa pulkat völjhyn ja lähtekää jonnekki laskemhan. Lasten kansa tai ilman."
Ei kommentteja:
Lähetä kommentti