Tiijättäkö, se alko taas..

 

     "Nimittäin se kauhea, kylmä ja pimeä kaamos. Tai niin net ihmiset kuvittellee. Lähtisivät ulos kävelhen ja kuikuilhen, että minkälainen son oikeasti.

     Kaamoksen aika on koko monen mielestä melkheimpä hienointa aikaa vuojesta. Siniharmaa maalima on rauhottavan näkönen ja pastellisävyt hivelee silmää. Son vain pitkäle asenekysymys, että mimmonen son. Osa ei halva että kessää oliskhan. Pölkäävät sääskiä. Toiset taas karsastaa syksyä, ko talvi pukkaa pääle. Joilekki taas kevät on kauheaa aikaa, ko pittää alkaa taas puuhomhin, nurmikon laithon ja muuhun semmoshen. Joka vuojenajassa on omat hyvät ja huonot puolensa. Pittää vain yrittää nähä net hyvät asijat. Muuten iskee se kovasti mainostettu masenus pääle, ko näkkee pelkkiä huonoja puolia. Eikä se ole pitemän pääle terhveelistäkhän.

     Vielä pitäs lähteä hiihtelhen hirvitten perässä ja käyvvä kuvvaamassa revontulia ja muutenki kulkea mettässä. Sielä on vielä helppo, ko lunta ei ole ko saaphan verran vasta. Kokkeilin mie kelkalaki ajjaa, mutta ajoin sen  liiterin pääthyn parkhin. Ajattelin kattoa lähempänä joulua, jos hakis kuusen mettästä. Lunta kyllä saapii tulla kovastikki, ennenku otan muuten käythön. Oli se sen verran jyleä ajjaa. Jänkälä oli hyvä mennä, mutta maala kaikki kivet ja pounut tuntu selvästi. Kävi oikhen kelkkaa sääliksi ko jyristin menhen, että kolina kuulu.

     Son kevhälä ja syksylä nämät rospuuttoajat vähä hankalia, ko pitäs päässä kulkhen, mutta kevhälä, ko lumi sullaa, on joka paikka vettä täynä. Ko taas syksylä on liian vähä lunta ja jäät heikkoja, ettei oikhen pysty sillä ajhan. Häätyy vain kokkeilla soppeutua.

     Joskus tuntuu, että son aurinko vishin pistäny vähä vauhtia lissää pyörimishen, ko aika mennee niin nopeasti. Vastahan soli ruska ja hirvenpyynti alko. Nyt jo ootelhan joulupukkia. Onneksi mie en ole ainoa, joka niin sannoo. Moni muuki on meinanu sammaa, ko olen raatinu niitten kansa. Tässä häätyy piettää kiirettä, että kerkiää tekhen kaikki mitä on suunitellu talven ajale, ko kohta se aurinko taas tullee kurkkimhan tuolta vaaran takkaa. Sitte meinaa tulla se riethan hoppu. Jo vain ainaki."