Resähti

      "Kyllä siinä sitte loppujen lopuksi hyvin kävi. Sain pari sorsaa ja pääsimä syömhän. Joskus se juoksuttaa kovastikki, mutta ko ottaa kuntoilun ja mielenvirkeyvven kannalta, niin ei se haittaa vaikka vähä on paikat puuvuksissa ko kotia mennee. Hyvvää reeniä sitte hirvenpyynthin.

     Mie laitanki tässä yhen hyvän linturesähtin. Son vishin muualaki käytössä, mutta sei haittaa mithän. Hyvvää son kuitenki.

     Ensin sie häyvvyt ampua yhen koskelon. Sitte sie nyljet sen ja peset hyvin. Ko se pakkaa maistumhan kalale, niin kaikki ei siittä tykkää. No ei mithän. Sie laitat sen ensin vethen likoamhan yön yli. Muista laittaa jääkaaphin, että pyssyy viileänä.

     Aamula kaajat veen poijjes ja laitat sitte linnun likoamhan maithon ja annat sen taas olla yön yli kylmässä. Näin sie saat makua vähä miejommaksi.

     Seuraavana aamuna sie sitte kaajat maijjon poijjes ja huuhtelet linnun hyvin. Sen jälkhen sie laitat sen likoamhan koskenkorhvan. Joku muuki kirkas viina käypii. Muistat vain, että son kirkasta. Ja muista laittaa taas viilejhän.

     Aamula sie sitte otat linnun pois jääkaapista, kaajat liemen lashin ja heität koskelon poijjes. Liemi juohan kylmänä. Ei maistu ennää kalale, ko tätä resähtiä seuraat. Älä kuitenkhan lähe pyythän lissää ennenku seuraavana päivänä."