"Viimheinki. Hirvenpyynti alko ja nyt taas olhan passsissa. Arki katkes ja pääsi methän. Sai vetassa mettäpuvun pääle. Son ko juhlakamphet olis päälä, paitti että ei ravatti ahista.
Ilma on ku morsian jos tuota kovvaa tuulta ei lasketa. Tukka hulmuaa ja itkettää päntiönhän ko sauvvu pyörittää koko ajan. Mutta on se soma.
Seisoskelen kapean jänkän laijassa oottelemassa, jos vaikka tulis vähä isompi elikko ko kuukkelit moikkaamhan. Kaalolta tuntuu vaikka aurinko paistaa. Sei kauheasti ennää lämmitä. Aamula oli aste pakkasta. Kyllä se talvi sauttaa.
Marjat on poimittu. Talvikallaa pittää vielä käyvvä pyytämässä ja liha on niin verestä, että vielä juoksee. Mutta eikhän se tästä. On tässä vielä aikaa. Ehtii tehä vielä paljon. Ja nauttia syksystä.
Ruskaki on kohta parhaimilhan. Sitä ei oikhen hoksaa ko vain kylälä pyörii. Ny häytyy kattella ja kuvata maholisiman paljon. Pitäs oikeasthan käyä semmosela oikeala ruskaretkelä. Ko vain joutais. Melkhein pitäs ottaa vapaapäivä sitä varten. No, kattoma sitä joutaako.
Mutta kulkekaa tet ruskaa ihhailemassa, jos vain pääsettä. Sei kauvvaa kestä. Tuuli puottaa lehtiä koko ajan.
Hyvvää syksyä! Muistakkaa pukea värikästä vastetta pääle!
Ei kommentteja:
Lähetä kommentti