"Taas son meilä kaamos ohi. Eteläläiset pittää sitä synkkänä ja masentavanna, muttei sitä täkäläiset ees oikhen hoksaa. Met tehemä ja touhuamma niinko ennenki ja sen pimeän hoksaa oikeasthan vasta sitte tai pareminki sen puuthen, ko aurinko ensi kerran näkkyy tuolta tuntureitten takkaa.
Mie lähin seku vasiten ja oikeasthan vähä rukatukselaki käymhän kirkola ja sieltä Paljasseläle, ko sielä on niin hienot maisemat. Oli soma pitkästä aikaa käyvvä. Sielä meinas olhen tunkoa, ko moni muuki oli hoksanu kans lähteä aurinkoa kattomhan. No, kyllä sinne hyvin mahtu. Pari paikalista tunsin sielä, mutta enämpi sielä oli outoja. Olisko ollu mökkiläisiä vai jouluturisteja sitte, mutta kovasti net näky kuvvaavan.
Se vain ko tuo tutkanseutu on jo niin koluttu, mutta ko ei ole oikhen muuala niin hienoa maastoa, helpon matkan päässä, ko sielä. Varsinki ko en ole vielä kelkkaa kehanu ottaa esile. Pittää oottaa ko lunta tullee enämpi. Ei kehtaa juuri lynksiä hajottaa, ko on niin jyleä keli vielä ajjaa.
Menkää ihmiset ulos kathon, ko sielä on nyt vuojen kommein aika. Luonto täynä pastellisävyjä. Ei siittä ennää värit kyllä parane."
Ei kommentteja:
Lähetä kommentti