Elämää pihala.

 

     "Kattelin aamukahvila ko jänekset laukko pihala. Net vain ilmesty jostaki yhtäkkiä eshin. Neljä ollu parhaimilhan yhtaikaa kartanolla ja keskelä päivää. Nolit ensin melkhein valkosia ja luulis, että silloin pysythän piilossa, mutta ei. Nämät pönötti keskelä pihhaa, aivan ko net olis oikhen tyrkyttänhe itteänsä petolinnuile.

     Äkkiä niilä kuiteski väri muuttu. Yks jänis on jääny hyvin mielhen. Sillä on oikhen punaruskea pää. Son jännän näkönen, ko muuten oli vaalea roppa, mutta naama punanen. Mie en tiijjä kuinka kauan jänekset ellää. Mie eppäilen, että son jo ainaki toista polvea. Tässä on sen verran pitkhän pyöriny yks semmonen yksilö, vuosikausia.

     Nuot värimuunokset on mielenkiintosia ja somia kattella. Son ko vanhaa tuttua näkis. Kah, sieki olet vielä hengissä. Meilä pyöri tässä vuosia sitte yks oikhen tumma orava. Soli tummanharmaa, melkhein musta. Monena vuotena sitte poikasia laukko pihamännyissä ja nurmikolla. Niitä ruukas olla ylhensäkki kolme ja yks oli aina semmonen tumma. Niin net geenit polveutu ethenpäin.

     Yks vähä pienempi jänis pyörii erityisesti tässä koko ajan. Son varhman jo tämän kevhän poikanen, niin mie luulen, koon mukhan. Molen aatellu, että son poikinu ja käypii imettämässä poikasia jossaki tässä lähelä. Tänä aamuna sitte kattoin ko se ajatti harakkaa poijjes. Mole koskhan nähny tuomosta. Harmi ko ei sattunu kamera olhen hollila. Sei kestäny ko kymmenkunta sekunttia, niin harakka hyppäs penshashen metrin korkeuvelle ja jänis jäi kyttäämhän sen alle.

     Sillon mulla välähti. Tuo sama harakka pessii vähän matkan päässä, tuola yhessä männyssä. Son kans semmonen vähä pienempi kokonen ja hakkee ruokaa talon ympäriltä. Son monesti liiterin rappusten vierelä ja kiertellee siinä. Tänä aamuna sitte hätistethin poijjes, Niin tietenki, son tuon jäneksen poikaset sielä rappusten alla! Sillä se vahtii niin tarkhan tässä. Häätyy vähä yrittää vähentää porthaitten päälä kävelyä, että saavat rauhassa kasuta. Sitä mie vain mietin, että pääsevät vain sitte poijjes, ko ei niisä varhman nuot raot ole ko viis senttiä.

     Sajetta lupas tälle päiväle. Hyvä päivä sisähomhin, ei haikaile kartanolle. Jäät on lähtenhe jo järvestä ja joki huilaa. Tuuli kuivas lumet sitä mukkaa ko net sulas. Ei tullu kovvaa tulvaa tänä vuona. Son hyvä, ei tule vahinkoja kelhen. Jos sitä viikonloppuna kerkiäis verkonheithon. Sais verestä tauroa, solis kylä hyvvää!"