Viihmeinki!

 

     "Nyt on senthän pakkasella, jokhan nyt tulis talvi? Joka vuosi se tuntuu niin kaalolta nämät ekat pakkaset. Vaikka ei olekhan ku viijjestä kymmenhen astetta, niin se tuntuu riethan kylmältä. Varsinki jos vähänkhän tuulee. Kummasti sitä ihminen soppeutuu kuiteski melko äkkiä. Kesäläki net helthet ei ennää kauheasti piinanhet loppuajasta, vaikka ensin tuntu ko saunassa istuis.

     Kävin tuossa viikonloppuna mettässä käveleskelemässä. Varvikko rousku, jänkät oli siinä kinthaala, että kestääkö sammalikko, mutta järven rannat kesti hyvin raahvan kävelä. Aurinkoki paisto pitkästä aikaa, tai ainaki se siltä tuntu, oikhen lämpimästi. Tuuli vain oli kaalo. Ei tehny mieli kauvvaa paikoilhan seisoskella.

     Ei sielä korppia kummempaa elävää näkyny eikä kuulunu, mutta soma oli kuiteski kävässä. Luonto alkaa rauhottumhan. Ja samala ittekki. Syksy onki ollu semmosta haipakkaa, että ei ole oikhen ehtiny hengähtääkhän kunnola.

     Ja tulihan sitä lunta viimhein. Kyllä sitä on ootettukki. Tosin on mulla muutampi tuttu sanonu, että ei sitä tarttis tullakhan. Net ei tykkää siittä yhthän. Mutta ajatteleppa jos sitä lunta ei olis ollenkhan.  Pakkanen tappas paljo elläimiä ja kasveja. Son koko monen elävän suoja. Ja mitenkhän riekot ja jänikset pärjäis, ko maa olis musta. Nehän loistais ko neonvalot kaupunkissa. Vaikka net on mestareita naakimhan, niin kyllä pevot net helposti löytäis.

 Meilä alkaa taas kohta turistisesonkiki. Toivottavasti lumi säilyy ja piisaa, ko moni aktiviteetti sitä tarttee. Son helpompi käyvvä pilkilä ko on jäätä, eikä ole niin jyleä ajjaa kelkala lumessa. Niin ja lumilinnaki on tehä. Luntahan net turistit tullee tänne hakhen. Loskaa ja märkää niilä on kotonaki. 

     Ajokelit on ny huonoja ja jäät heikkoja. Piättä vain olla varovaisia ko lähettä liikhele. Sitä ku lähtee pikkusen etua, niin ei tartte kaahata tielä. Kelin mukhan pittää ajjaa. Samaten ko jäälä liikutta, niin pittää muistaa, että son vielä ohkanen. Ei meilä senthän niin kovia pakkasia ole ollu. 

     Ei se auta. Aamukahvit on juotu ja hommat oottaa. Häätyy vettää takki niskhan ja mennä vähä pihhaa kollaamhan ennen töihin lähtöä. Pittää sitä porthaitten evustat piettää puhthana, vaikka ei koko kartanoa kehtaa pukata. Vähäsen on satanu ja koko ajan näkkyy tulevan lissää. Mutta sitähän molema jo ootelhekki. Hyötyliikuntaa parhaimilhan.

     Turvalista talven alkua ja mukavaa kollaamista!"