"Tet varhman oletta joskus olhet tilanthessa, jossa tunnetta ittenne oikhen väsynheksi. Mie en tarkota semmosta fyysistä väsynystä, ko semmosta henkistä väsymystä. Jokku viishamat puhhuu aivosumusta. Saattaa se semmostaki olla.
Ylhensäkki henkinen väsymys tullee ressistä, liiasta työnteosta, sairauesta, lähheisen poismenosta, elämäntilantheista joile met emmä välttämättä pysty itte mithän.
Tässon ollu pari raskasta viikkoa takana. Kaikenlaista on tullu hommattua ja kaikkea on tapahtunu. Torstaina mie sitte totesin kotona, että nyt tämä laukkominen ja ressaaminen saapii riittää. Lähemä mökile rauhiottumhan.
Ja niin met sitte tehimä. Karkasima töistäki vähä varemin ja hurhautima mökile. Pari yötä mettässä, mökilä puuhastelua, lintujen seurailua, kelkkailua ja pilkkimistä. Pää tyhjeni ajatuksista ja akut lattautu taas kummasti. Kyllä se mettäterapia on parasta ihmisen jaksamisele."
Ei kommentteja:
Lähetä kommentti