"Lumihiutalhet leijjailee hiljokshen maahan. Naurattaa ajatus, että non nekki omaksunhet ajatuksen meijjän kiirhettömästä elämäntavasta. Hithaasti net kattoo, että mihinkhän mie asettauvun. Oliskhan tuossa lumipaakun vieressä hyvä paikka vai tippusinko tuohon penshan tyvhen. Onhan tässä aikaa miettiä, ei mithän kiirettä.
Köykänen on ollu kolata. Semmosta höttyrää. Soma son välilä ulkoilakki kartanola, mutta ko sitä tullee koko ajan. Satas kerrala kunnola ja pitäs sitte pitkhän taukoa. Sais tehä muutaki.
Kävästin tässä kaupassa viime torstai-iltana. Kylän suorala ajaessa ihmettelin, että mikhän homma son, ku postin kohala oli kauheasti autoja. Mie ajattelin jo, että sunkhan siinä ole kolaria sattunu. Siinä oli piha täynä autoja ja tien laijjassa oli varhman toistakymmentä jonossa.
Kaupassa sitte kuulin, että Teboilila oli bensatarjous. Myythin polttoainheita euro viijjenkymmen litrahinthan. No, se se sitte selittääki. Kyllä se mieki ajastin sinne kattomhan, mutta pyörsin takasi ko sielä oli jono vain kasunu. Emmie jaksanu alkaa jonottamhan ja kello oli jo sen verran, etten molis keriny tarjousaikhan tankile kuitenkhan.
Kuluttelin siinä kylälä sitte muuten aikaa ja menin seittemän jälkhen tankkaamhan ko ei ollu ennää jonoakhan. Pärjäs siinä sitte kuitenki kymmenen senttiä litralta. Olis sitä kuiten muutenki pitäny tankata.
Jonosta tuli muistoja mielhen, ko kävi Venäjällä sillon yheksänkymmentä-luvun alussa. Sielä oli samalaiset jonot bensa-asemilla, paitti että noli varhman kilometrin mittaset.
Suomalaiset on kovia jonottamhan ja näkkyy se koskevan meitä enontekiöläisiäki. Kyllä mie tuon bensajonon niinki ymmärän, ko ihmisten pittää liikkua autoila ja kelkoila mettässä ja leipäjonon ko ei taho olla rahhaa ruokhan, mutta sitä mie ole oikhen koskhan ymmärtäny, että jonotethan ilmasten ämpäreitten kansa. Niitä ko saapii parila kolmela eurola kaupoista. Eikä tartte jonossa palella. Ihmiset on vireät tarjousten perhän.
No se. Mie jonotan sitte tankila ko tartten kelkhan bensaa, jos siinä sattuu olhen muitaki. En mole kyllä vielä ees ottanu sitä oikhen esile, ko ei ole ollu kauheasti tarvetta. Sielä son ressun alla. Esittää enämpi lumikinosta ku kelkkaa. Pittääpä vasiten kaivaakki se esile ja käyvvä ajastamassa mökile jälki. Pääsee pitemhän kulkemhan kevhälä, ko ajjaa kunnon pohjan sinne.
No, sempä mie taijjanki huomena tehä, jos tässä kollaamiselta kerkiää."
Ei kommentteja:
Lähetä kommentti