Et sunkhan sie sokkerista ole?

 

     "Kyllä soli melkonen saje tässä yks päivä. Oikhen maahan asti sato. - mie raatasin väärtin kans kahvin äärelä. -Päivän tuhnutti ja illala ei uskaltanu lähteä ees roskia viemhän katokshen. Siinä olis kastunu läpimäräksi vaikka matkaa ei olis ollu ku parikymmentä metriä.

      Väärti kuunteli ja sano sitte mulle, että et sunkhan sie sokkerista ole? En mie ole, mutta mie kuiteski tykkään paremin käyä suihkussa ilman vaatheita. Hänestä en tiijjä, en hoksanu kysyä.

     Meilä on ollu rohki soma tämä loppukesä. Lämmintä on piisanu ja ötököitäkhän ei näy ko vasta illala.

     Mutta ei ole pelkästhän hyvvää ole. Molen kattonu ku tiaset hakkee ruokaa maasta. Ei ole ennää lentäviä hyönteisiä. Samaten yks päivä kattelin pihala suenkorentoa. Ei silläkhän kauheasti saalhit pörrää ympärilä.

     Pihanurmi on halkeillu, samaten jänkät on kuivanhet. Saapii lipposet jalassa kulkea. Ei kastu sukat. Kerran molen harkanu jo pihakoijjujen lehet. Aivan ko olis ruskan aika. Puut kellertää siihen malhin. Mutta kuiva sen tekkee. En mie muista tämmöstä ennen. Jotaki pientä ollu joskus.

     Onneks se jonku verran sato. Ens häthän. Mutta kyllä sitä tullee lissää. Ootappa vain."

     

     

Sähkölä joutuu.

     "Lomat on lusittu ja arkhen on taas palattu. Vaphaala on saanu pääkopan tuuletettua kunnola. Eikhän se taas tästä lutviuvvu.

     Kalassaki tuli käytyä parhinki otheshen. Tunturissa on aina yhtä soma pyörähtää. Kelikki on olhe aika kohilhan. Ja kaiken kruunas, ko pysty onkimhan jokiruvossa t-paitasilhan. Ei ole ennää ötököistä riesaa. Iltasella vain hoksas, että net viimiset vihulaiset on tulhe. Ilma ko jähty ja tuuli tyynty, niin polttiaisia alko ilmestymhän. 

     Tänä vuona on kaikki tulhe pari viikkoa etuajassa. Toivottavasti sitte katoavakki samala laila, että saapii olla hirvimettälä rauhassa.

     Mettässä näky paljo pyöräilijöitä. Kaikila oli sähköpyörä. Siittä on tullu suosittu harrastus. Onhan se tieten vähä joutusampaa niilä liikkua ku kävelemälä. Ainut vain, että niitä saattaa olla hankala laata jos on monta päivää reisussa.

     Mie en hoksanu kysässä kelthän, miten non sen lattaamisen järjestänhe. Ainakhan sielä missä mie liikuin, ei näkyny kyllä yhthän pistorasiaa, eikä niilä pojila tullu jatkoroikkaakhan perässä ko polkivat. Kait niilä jokku aurinkopaneelit on matkassa.

     Molen tässä pähkäily, että taijjan mieki joku päivä vasiten vuokrata semmosen pyörän ja käyä kokkeilemassa minkälainen härveli se oikhen on. Tiijjä vaikka innostuis hommaamhan ittelekki semmosen joku päivä. Riethan kalhiita net kyllä on, mutta jos niilä pysyis paremin hirven perässä.

    Poikasena tuli jonku verran pyöräiltyä mettässä, mutta ei niilä jaksanu kuiten hiekkateitä ajjaa. Venkoili miten sattuu ja kulku tyssäs aina ylämäkhen. Sitte saiki pukata. Kyllä niilä tavalisila pyörilä pääsi kovvaa polkua ja tasamaata pitkin.

     Häytyy saaha aikaseksi ruskan aikana sitte. Maisemat on ainaki sen verran komeat, että ei välttämättä ota päähän niin paljoa, jos sei olekhan sommaa. Ja voipiihan sitä piettää kuvvaustaukoja enämpi jos siltä tuntuu.

     Häätyy sitte kirjotella enämpi, jos sen saapii aikaseksi. Nyt kuiteski nautithan kesän lämmöstä ja sääskettömästä ajasta. Ja tieten keräthän mustikat talven ajaksi."