"Näin se väärti tokas mulle ko istuima kahvila. Soli ajanu auton perässä ja kattonu ko soli ajanu liian laijjassa koko ajan. Yhtäkkiä soliki tempassu palthesta ja syökyny mettävaltion puolele. Pölinä vain oli käyny. Siinä ei onneks tapahtunu mithän vakavampaa. Ulkolaiset olit vain vähä säikähtänhet.
Tuola tien päälä ko liikkuu, niin sielä näkkee vaikka minkälaista asijaa. Tässäten mulla meni eelä auto, joka enimäkshen ajo keskelä tietä ja välilä vasenta kaistaaki. En tiijjä kuka oli ratissa, ko en nähny. Mulla ei ollu niin kauheaa hoppua, että olis tarvinu alkaa ohittamhan. Toishaalta vähä kyllä mietityttiki, että menenkö, ko tuola laila seilaa ees kahtaale. Se kuiteski ajo melkhein kaheksaakymppiä, niin tyyvyin köröttelhen perässä.
Onneksi täälä meilä päin sattuu nuita ulosajoja ja kolareita kohtuu vähäsen. Rekakki on alkanhe pysymhän tien päälä. Niissä on vishin kokenhemmat kuskit liikhelä vai onko net sitte vähentynhe? Minusta niitä kuiteski kulkee nokko tuola tielä.
Lehtiä ko lukkee, niin välilä siton miettiny, että kannattaako nuita ulkolaisia päästää täälä auton rathin ollenkhan. Mutta sitte ko miettii, niin monesti ratin takana on vanhempi kuski, ushein paikalinen. Näilä perilä oma auto on melkheimpä se ainoa konsti päässä asijoile ja käymhän kaupassa. Siitä pietethän kiini viimishen asti. Mullaki isä oli pitkästi yli kaheksankymmenen ko viimhein luopu kortista. Se hoksas ittekki, että ei ennää nähny pimeälä. Kaihi tuli silhmin. Taksila net sitte huristeli ja välilä met muut kuskasima ko tarttivat.
Mie en meinaa, että vanhoilta pitäs ottaa kortti poijjes. Aattelin vain kirjottaa aihheesta, ko monesti kattonu huolestunheena menoa tien päälä. Kyllä sitä meikäläinenki ossaa koheltaa. Kaupungissaki pakkaa ensin ajamhan päin punasia, ko eihän niitä täälä meilä ole. Parit ko huitassee suorhan, niin kyllä se sitte alkaa taas muistumhan. Varsinki ko kartturi pölkää ja huutaa vieressä.
Turvalista matkaa kaikile tien päälä liikkujile. Menkää terhveenä ja tietenki tulkaa takasikki."
